काठमाडौं– कोरोना भाइरस (कोभिड–१९)को संक्रमण रोक्न सरकारले देशव्यापी रुपमा जारी गरेको लकडाउनको समयमा सडकमा निस्किनेविरुद्ध प्रहरीले कारबाही प्रक्रिया अगाडि बढाएको छ ।

लकडाउनको पहिलो दिन (मंगलबार) प्रहरीले सडकमा आएका सवारी साधन ल्याउने चालकलाई सम्झाइ बुझाइ छाड्दै आएको थियो । तर, सडकमा आउने क्रम नरोकिएपछि बुधबारदेखि नियन्त्रणमा लिन थालिएको हो ।

महानगरीय ट्राफिक प्रहरी महाशाखाका अनुसार बुधबार बिहानै काठमाडौंका विभिन्न ठाउँबाट ३ सयको हाराहारीमा सवारीसाधन नियन्त्रणमा लिइएको छ ।

प्रहरीले काठमाडौंको टेकु, नयाँ वानेश्वर, चक्रपथ क्षेत्रबाट सडकमा निस्किएका सवारी साधनलाई नियन्त्रणमा लिएको हो ।

यसअघि नियन्त्रणमा लिइएका सवारी साधनलाई प्रहरीले साँझ परेपछि सवारीधनीको जिम्मा लगाउँदै आएको थियो । तर, अब भने केही दिन ‘होल्ड’ गरिने महानगरीय ट्राफिक महाशाखाका प्रमुख प्रहरी वरिष्ठ उपरीक्षक (एसएसपी) भीम ढकालले जानकारी दिए ।