काठमाडौं – अखिल नेपाल फुटबल संघ (एन्फा) ले आफ्नो मातहतका भौतिक संरचनाहरुलाई अस्थायी क्वारेन्टाइन र आइसोलेसन बनाउनका लागि सरकारलाई हस्तान्तरण गर्न तयार रहेको जनाएको छ ।

एन्फाले आइतबार विज्ञप्ति जारी गर्दै ललितपुरस्थित एन्फा कम्प्लेक्सको होस्टल, बुटबल र धरानको फुटबल एकेडेमीका होस्टल र रौतहटको महिला फुटबल एकेडेमी आवश्यक पर्दा क्वारेन्टाइनका लागि प्रयोग गर्न सकिने जानकारी दिएको हो ।

एन्फा प्रवक्ता किरण राईले जारी गरेको विज्ञप्तिमा भनिएको छ, ‘अखिल नेपाल फुटबल संघको भौतिक संरचनाहरु ललितपुरको एन्फा कम्प्लेक्सको होस्टल, बुटबल र धरानको एकेडेमीका होस्टल, रौतहटस्थित महिला एकेडेमीको होस्टल अस्थायी क्वारेन्टाईन र आइसोलेसनको लागि आवश्यक परेको खण्डमा नेपाल सरकार, प्रदेश सरकार वा स्थानीय सरकारले प्रयोग गर्न सक्ने कुरा जानकारी गराउँन चहान्छु ।’

एन्फाले सम्पूर्णलाई आ–आफ्नो स्थानमा सुरक्षीत साथ बस्न समेत आग्रह गरेको छ । एन्फाले यसअघि नै आफ्नो कार्यालयदेखि सबै फुटबल गतिविधि बन्द गरिसकेको छ ।