काठमाडौं – चैत्र २९ गतेबाट प्रदर्शनमा आउन लागेको फिल्म ‘ए मेरो हजुर ३’ को लोकशैलीको गीत सार्वजनिक गरिएको छ । ‘परान’ बोलको गीती भिडियोलाई बुढासुब्बा डिजिटलको च्यानलबाट सार्वजनिक गरिएको हो ।

गीतमा आशिष अविरल र अञ्जु पन्तको स्वर सुन्न सकिन्छ । आनन्द अधिकारीका शब्द रहेको गीतमा संगीत र एरेन्ज गायक अविरलको नै छ । यस्तै गीतको मिक्सिङ एचबीएन किस्मतले गरेका छन् ।

लोकशैलीको गीतको भिडियोमा अनमोल केसी र सुहाना थापाले नाचेका छन् । भिडियोमा अनमोल र सुहानालाई रोमान्टिक मुडमा प्रस्तुत गरिएको छ ।

झरना थापाले निर्देशन गरेको यो फिल्मको कथा निर्देशक थापा र सुमन पौडेलले तयार पारेका हुन् । यस्तै फिल्मको पटकथा तथा संवाद छेतेन गुरुङ, बाबुराम दाहाल, सुमन पौडेल र प्रतीक पौडेलले लेखेका हुन् ।

सुहाना थापाको डेब्यु फिल्मसमेत रहेको यो फिल्म्मा अनमोल र सुहानाका अलावा अर्पण थापा, सलोन बस्नेत, रविन्द्र झा, रुपा घिसिङ, रक्षा गौतम, विशाल पहाडी, सरोज खनाल, रियल राई लगायतका कलाकारले अभिनय गरेका छन् ।

फिल्मले रिलिजअघि राम्रो हाइप बटुलेको छ । फिल्ममा एउटा रोमान्टिक लभ स्टोरी देख्न सकिनेछ ।