काठमाडौं – केही वर्षअघि दयाहाङ राईको एकछत्र राज थियो । उनका फिल्म हप्तैपिच्छे पनि आउन थालेपछि दर्शकलाई दयाहाङका फिल्म हेर्न वाक्क लाग्न थाल्यो । जे होस्, बीचमा केही समय भने उनका फिल्म दर्शकले हेर्न पाएका छैनन् । केही अघि हलमा रिलिज भएका फिल्मले पनि खासै दर्शकको क्रेज तान्न सकेनन् ।

अब भने दयाहाङलाई उनका फ्यानले फिल्म ‘साइँली’ मा देख्नेछन् । यो फिल्ममा उनीसँगै मुख्य भूमिकामा गौरव पहारी, केनिपा सिंह र मेनुका प्रधानको पनि भूमिका छ । फिल्ममा रामबाबु गुरुङको निर्देशन छ ।

आउँदो चैत्र १५ गतेलाई रिलिज मिति तोकेको यो फिल्ममा दयाहाङको क्रेज देखिएला त ? ट्रेलर हेर्दा भने दयाहाङलाई दर्शकले रुचाएका छन् । अर्कातिर यो फिल्मको ट्रेलरमा बोलेको एक संवाद यतिबेला सामाजिक सञ्जाल टिकटकमा पनि रुचाइएको छ ।

साथै उनी ‍फिल्म ‘जात्रै जात्रा’ मार्फत दर्शक सामुन्ने आउँदैछन् । दुवै फिल्मले दयाहाङले आफ्नो गुमेको क्रेज फिर्ता ल्याउने अनुमान गरिएको छ ।

यद्यपि यी फिल्ममा पनि उस्तै विषयवस्तु र उस्तै भूमिकामा दयाहाङलाई देख्न सकिन्छ । यो अर्थमा भने दयाहाङ राई केही दिन हल आउने र हराउने नहोलान् भन्न सकिन्न । यसै पनि यतिबेला फिल्म हलमा दर्शकको राम्रै खडेरी जो परेको छ ।