काठमाडौं- विश्वमा महामारीका रुपमा फैलिएको कोरोना भाइरसको संक्रमणले खेलकुदका गतिविधि प्रभावित भएका छन् ।

इंग्लिस फुटबलका सम्पूर्ण गतिविधि स्थगित भएको छन् । कोरोना भाइरसको विश्वव्यापी महामारी फैलिएका बेला त्यसबाट जोगिने प्रयास स्वरुप इंग्ल्याण्डका सबै फुटबल गतिविधिहरु कम्तिमा आउँदो अप्रिल ३० सम्मका लागि स्थगित भएका हुन् ।

यसबाट इंग्ल्याण्डमा हुने सबै खेल प्रभावित भएका छन् । इंग्लिस प्रिमियर लिग, लिग कप फुटबल (इएफएल), महिला सुपर लिग र महिला च्याम्पियनसिपका खेलहरु स्थगित भएका हुन् ।

यस्तै स्कटल्याण्ड, वेल्स र उत्तरी आयरल्याण्डका सबै खेलहरु हाललाई पछि सारिएका छन् । हालको सिजन लम्बिने फुटबल एसोसिएसनले बताएको छ । अहिलेको नियम अनुसार जारी सिजन जुन १ मा अन्त्य हुने थियो ।