काठमाडौं– कोरोना भाइरस महामारी नियन्त्रणका लागि पाकिस्तानले सक्दो प्रयास गरिरहेको स्वास्थ्य मामिलाका लागि पाकिस्तानी प्रधानमन्त्री इमरान खानका विशेष सल्लाहकार जाफर मिर्जाले जनाएका छन् ।

कोरोना भाइरसविरुद्ध साझा रणनीति बनाउन सार्कका नेताहरुको भिडियो कन्फरेन्समा बोल्दै उनले पाकिस्तानमा यसको रोकथामका लागि आवश्यक स्वास्थ्य सतर्कता अपनाएको समेत जनाए ।

कोरोना भाइरसलाई विश्व स्वास्थ्य संगठन डब्लूएचओले विश्वव्यापी महामारी भनेको भन्दै उनले यसको रोकथाम पनि सम्भव रहेको जनाए ।

कोरोना भाइरसका कारण विश्वमा हालसम्म १ लाख ५५ हजार भन्दा धेरै संक्रमित, ५ हजार ८ सय ३३ जनाको मृत्यु भएको र यसको संक्रमण १ सय ३३ मुलुकसम्म पुगिसकेको भन्दै मिर्जाले यसको चुनौति पनि ठूलो रहेको बताए ।

‘दक्षिण एसियाका सबै मुलुकमा संक्रमण देखा परिसकेको छ ।’ उनले भने ।

यो महामारीविरुद्ध लड्नका लागि विज्ञानमा आधारित समाधान खोजिनुपर्ने उनको भनाइ छ । त्यस्तै, उनले सार्क यसविरुद्धको लडाईंमा महत्वपूर्ण हुने विचार व्यक्त गरे ।

‘सार्क यसका लागि महत्वपूर्ण छ । कोरोना नियन्त्रणका लागि स्वास्थ्य सूचना आदान प्रदान तथा तथ्यांक आदान प्रदान गर्ने व्यवस्था मिलाउन आवश्यक छ ।’