काठमाडौं – पूर्वमिस नेपाल उषा खड्की र जिपी तिमिल्सिना अलग्गिएका छन् । सन् २००० की मिस नेपाल उषा र सञ्चारकर्मी जिपी तिमिल्सिनाको सम्बन्धमा केही वर्षयता दरार आएको थियो ।

उषाले आफू शारीरिक र मानसिक रुपमा दुर्व्यवहारमा परेर एकसाथ बस्न नसक्ने उल्लेख गर्दै ‘नाइँ’ भनेको बताएकी छिन् ।

लामो समयदेखि परिवारमा खटपट परे पनि मिडियामा डिभोर्स हुन लागेको हल्लापछि यी दुईले आफूहरुले डिभोर्स गर्न नखोजेको दाबी गर्दै आएका थिए । अब भने उषाले आफू कानूनी रुपमा अलग हुने निर्णय गरेको बताएकी छिन् ।

उषाले आफ्नो आधिकारिक फेसबूकमा एक स्टाटस लेख्दै भनेकी छिन्, ‘यदि तपाईं बिहेको १७ वर्षपछि पनि शारीरिक र मानसिक यातना सहनुपर्छ भने यसलाई निरन्तरता दिन आधार छैन, अब म ‘नो’ भन्छु ।’

उनले अब सन्तानको अधिकारका लागि लड्ने पनि बताएकी छिन् ।

जिपी र उषाले प्रेमविवाह गरेका थिए । झण्डै १७ वर्ष साथै बसेपछि यी दुईले छुट्टिने निर्णय गरेका हुन् ।

साथै उषाले एक अन्तर्वार्ताका २ क्लिप पनि सार्वजनिक गरेकी छिन् । उक्त क्लिपमा उषा बोल्दाबोल्दै भक्कानिन्छिन् ।

उषाले शनिवार यो कुराको जानकारी गराए पनि कानूनी डिभोर्स हुन बाँकी रहेको बताएकी छिन् ।