भारत– भारतमा अध्ययनरत एक जना नेपाली विद्यार्थीको पौडी खेल्ने क्रममा डुबेर ज्यान गएको छ ।

भारतको राजधानी दिल्लीको जामिया मिलिया इस्लामियाको नेल्सन मण्डेला सेन्टर फर पिस एण्ड कन्फ्ल्क्टिमा अध्यनरत नेपाली विद्यार्थी मिलन पौडेल गंगा नदीमा मृत अवस्थामा फेला परेका भारतीय प्रहरीले जनाएको छ ।

भारतीय सञ्चार माध्यमहरुका अनुसार उत्तराञ्चल राज्यको ऋषिकेशस्थित गंगा नदी किनारमा पौडेलको शव भेटिएको थियो ।

गत मंगलबार फागू पर्वका अवसरमा साथीसँगै मिलन दिल्लीबाट ऋषिकेश पुगेका र पौडी खेल्ने क्रममा तपोवन क्षेत्रको गंगा नदीमा डुब्न पुगेको स्थानीय प्रहरीले जानकारी दिएको छ ।

मिलन पानीमा डुबेपछि उनलाई बचाउन गएका जम्मु–कश्मीर घर भएका तुषार कौशिकको समेत मृत्यु भएको टाइम्स अफ इण्डियाले जनाएको छ ।

२५ वर्षीय मिलन ३ महिनायता दिल्लीमा भड्किएको धार्मिक दंगाको वृत्तचित्र बनाउने काम गरिरहेका थिए ।