काठमाडौं – प्रकाश सपूत, वर्षा शिवाकोटी, केकी अधिकारी लगायतको अभिनय रहने फिल्म ‘परदेशी २’ को २० प्रतिशत छायांकन सकिएको छ । निर्देशक नारायण रायमाझीले फिल्मको छायांकन पूर्व निर्धारित योजनाअनुसार नै भइरहेको बताए ।

कोरोना भाइरस संक्रमणको भयले नेपाली फिल्म क्षेत्रमा प्रभाव परिरहेका बेला निर्देशक रायमाझीले भने छायांकनमा खासै प्रभाव नपरेको प्रतिक्रिया दिए ।

यतिबेला फिल्मको छायांकन पोखरा र आसपासका क्षेत्रमा भइरहेको छ । फिल्मको छायांकनका लागि केकी अधिकारी, प्रकाश सपुत लगायतको कलाकारको टिम पोखरामा छ ।

पोखरामा रहेका निर्देशक रायमाझीले भने, ‘फिल्मको छायांकन भइरहेको छ, कोरोनाले खासै समस्या पारेको छैन, पछि कस्तो अवस्था हुन्छ, त्यो भने भन्न सकिने अवस्था छैन ।’

वैदेशिक रोजगारीमा जाने नेपालीको कथा समेटिने यो फिल्ममा प्रकाश सपूत शीर्ष भूमिका छन् । यसअघि रायमाझीले ‘परदेशी’ नामक फिल्म बनाएका थिए । उक्त फिल्ममा प्रशान्त तामाङले शीर्ष भूमिका निभाएका थिए ।

उक्त फिल्मले पनि राम्रो चर्चा कमाएको थियो । ‘परदेशी २’ चाहिँ आगामी वर्षको दशैंमा प्रदर्शनमा ल्याउने निर्माण टिमले जनाएको छ ।