काठमाडौं– नेपाली सेनाका अर्का एक अधिकृतले संयुक्त राष्ट्रसंघमा उच्च तहको जिम्मेवारी सम्हाल्न पाउने भएका छन् ।

नेपाली सेनाका सहायक रथी दिपक कुमार बानियालाई संयुक्त राष्ट्रसंघको दक्षिण सुडान मिसन (युएनएमआईएसएस)मा सेक्टर कमाण्डरको जिम्मेवारी मिलेको हो ।

राष्ट्रसंघको दक्षिण सुडान मिसनमा फोर्स कमाण्डर र डेपुटी फोर्स कमाण्डरपछि सेकटर कमाण्डर तेस्रो उच्च तहको पद हो ।

हाल उक्त मिसनमा नेपाली सेना र सशस्त्र प्रहरी बलबाट गरी करिक २ हजार सुरक्षाकर्मी शान्ति सैनिकको रुपमा परिचालित छन् ।

उक्त मिसनको फोर्स कमाण्डरको रुपमा भारतीय सेनाका रथी (लेफ्टीनेन्ट जर्नेल) शैलेश तिनैकर छन् ।

यसअघि नेपाली सेनाका तर्फबाट सहायक रथी नैनराज दाहालले पनि उक्त मिसनमा सेक्टर कमाण्डरको जिम्मेवारी सम्हालि सकेका छन् ।

संयुक्त राष्ट्रसंघको दक्षिण सुडान मिसनमा नर्थ, इस्ट, वेस्ट, साउथ र जुवा गरी ५ वटा सेक्टरहरु छन् ।

नेपाली सेनाका उपरथी ईश्वर हमालले केही दिन अगाडि मात्रै संयुक्त राष्ट्र संघको अनफड मिसनमा फोर्स कमाण्डरको जिम्मेवारी पाएका थिए ।

संयुक्त राष्ट्रसंघको आह्वानमा विश्वा शान्ति स्थापनार्थ सेना परिचालन गर्ने १ सय २२ देशमध्ये नेपाल चौथो स्थानमा छ ।

हाल नेपाली सेना, नेपाल प्रहरी तथा सशस्त्र प्रहरी बलबाट गरी ५ हजार ६ सय ५८ सुरक्षाकर्मी शान्ति सेनाको रुपमा परिचालित छन् ।