सिड्नी– कोरोना भाइरसको संक्रमण विश्वभर फैलिरहेका बेला हालै सार्वजनिक एक शोधले विश्वभर करीब डेढ करोडको ज्यान जान सक्ने निष्कर्ष निकालेको छ ।

अस्ट्रेलियन नेशनल युनिभर्सिटीको शोधमा महामारीको १ वर्षभित्र डेढ करोड मानिसहरुको मृत्यु हुनसक्ने आशंका गरिएको छ । उक्त शोधमा कोरोनाभाइरसको कारण विश्वको अर्थतन्त्रमा पनि नकारात्मक प्रभाव पर्ने समेत उल्लेख छ ।

बेलायती पत्रिका डेलीमेलका अनुसार उक्त शोधमा कोरोनाको महामारी विकराल बनेको अवस्थामा यसबाट विश्वभर ६ करोड ८० लाख करोड मानिसहरुले ज्यान गुमाउन सक्ने निष्कर्ष छ ।

यसरी ज्यान गुमाउनेमध्ये दशौं लाख अमेरिका र बेलायतका बासिन्दा हुनेछन् ।

अघिल्लो वर्षको अन्त्यबाट चीनको वुहान शहरबाट फैलिएको कोरोना भाइरसका कारण विश्वभर हालसम्म करिब १ लाख मानिसहरु संक्रमित भइसकेका छन् भने करिब ३३ सयले ज्यान गुमाइसकेका छन् ।