काठमाडौं– प्रमुख प्रतिपक्षी दल नेपाली कांग्रेसले स्कुल-कलेजलाई तत्काल बन्द गर्न निर्देश दिन सरकारसँग माग गरेको छ ।

शुक्रवार बसेको प्रतिनिधि सभा बैठकको शून्य समयमा कांग्रेस सचेतक पुष्पा भुसालले कोरोनाका कारण लाखौं बालबालिका जोखिम मोलेर स्कुल गइरहेको भन्दै स्कुल-कलेज तत्काल बन्द गर्नका लागि सरकारलाई निर्देशन दिन आग्रह गरिन् ।

जिल्ला प्रशासनले भीडभाडमा नजान सर्कुलर जारी गरेको भएपनि लाखौं बालबालिका स्कुल जान बाध्य रहेको उनले बताइन् ।

‘हिजो भर्खरै मात्र जिल्ला प्रशासनले भीडभाडमा नजान भनेको सर्कुलर पढ्न पायौं । एकातिर जिल्ला प्रशासनले परिपत्र गर्ने अर्कातर्फ लाखौं हाम्रो बालबालिका स्कुल जान बाध्य छन् । चैत ५ सम्म स्कूल बन्द नगर्ने भनेर अर्को सूचना आएको छ,’ सांसद भुसालले भनिन्, ‘एकातर्फ जिल्ला सूचना जारी गर्ने अर्कातर्फ बालबालिका यस्तो जोखिमपूर्ण यात्रा तय गर्नुपर्ने भएकाले सभमुखमार्फत सरकारको ध्यानाकर्षण गराएर स्कुल-कलेजलाई तत्काल बन्द गर्न निर्देश गर्न माग गर्दछु ।’