काठमाडौं– नेपाली राजदूतावास जापानले जापानमा रहेका नेपालीलाई कोरोना भाइरसको संक्रमणबाट बच्नका लागि सावधानी अपनाउन अनुरोध गरेको छ ।

एक विज्ञप्ति जारी गर्दै जापानका लागि नेपाली राजदूतावासले विभिन्न देशहरुमा कोरोनाभाइरसको प्रकोप देखिएको र सो प्रकोप जापानमा समेत देखा परेको भन्दै संक्रमणबाट टाढा रहनका सावधानी अपनाउन अपिल गरेको छ ।

उसले त्यसका लागि केही उपाय पनि जारी गरेको छ ।

संक्रमित बिरामीको सम्पर्कमा नआउने, भाइस प्रभावित क्षेत्र र देशको यात्रा नगर्ने, यथासक्य सार्वजनिक यातायातको प्रयोग नगर्ने, भेटघाट, भेला तथा जमघट, बैठक जस्ता कार्यक्रमहरु नगर्न राजदूतावासले नेपालीहरुमा आग्रह गरेको छ ।

कोरोनाको संक्रमणको शंका लागेका जापान सरकारले उपलव्ध गराएको हटलाइन टेलिफोनमा सम्पर्क गर्न दूतावासले आग्रह गरेको छ ।