काठमाडौं- रक्षा मन्त्रालयले नेपाली सेनाका १० प्रतिशत जनशक्तिलाई संयुक्त राष्ट्र संघ शान्ति मिसनमा खटाउने तयारी गरिरहेको जनाएको छ।

उपप्रधानमन्त्री एवं रक्षा मन्त्री इश्वर पोखरेलले बुधबार मन्त्रालयमा आफ्नो कार्यकालको दुई वर्षको प्रगति विवरण सार्वजनिक गर्दै संयुक्त राष्ट्रसंघको शान्ति सेनामा १० प्रतिशत नेपाली सेना खटाउने विषयमा कुरा भइरहेको जानकारी दिएका हुन् ।

उनले नेपाली सेनालाई शान्ति मिसनमा पठाउँदा पहुँच  तथा नातावादको अन्त्य गर्नका लागि ‘शान्ति सेना छनोट कार्यविधि’ तयार गरिएको समेत जानकारी दिए ।

उपप्रधानमन्त्री पोखरेलले दुई वर्षको अवधिमा रक्षा मन्त्रालयले नीतिगत तथा कानूनि सुधारतर्फ उल्लेख्य कामहरु गरेको बताए।

उनले राष्ट्रिय सुरक्षा नीति २०७३ लाई परिमार्जन गरी राष्ट्रिय सुरक्षा नीति २०७५ पारित भएको, राष्ट्रिय सुरक्षा विधेयकलाई अगाडी बढाइएको, सैनिक ऐन २०६३ मा रहेका नमिल्दा कुराहरुलाई संशोधन गरिएको लागयतका नीतिगत सुधारका कामहरु गरेको जानकारी दिए ।

हाल संयुक्त राष्ट्रसंघ शान्ति सेनामा नेपालबाट ५ हजार १ सय जना सैनिक अधिकृत र जवानहरुको सहभागिता रहेको छ।