काठमाडौं – पूर्वमिस नेपाल निकिता चण्डक अभिनेता विराज भट्टसँग फिल्म ‘साङ्लो’ बाट नेपाली फिल्म उद्योगमा डेब्यु गरिन् । पहिलो फिल्मबाट निकिताले धेरथोर चर्चा बटुलिन् । निकिता यो फिल्मबाट आशावादी पनि थिइन् ।

फिल्म रिलिज भयो । विराजको एक्सनको चर्चा भयो । निकिताले यो फिल्मलाई आफ्नो बलियो डेब्यु बताएकी थिइन् ।

पहिलो फिल्ममा एक्सन स्टारको साथ पाएकी निकिता यतिबेला आफूलाई थप परिचय दिने फिल्मको पर्खाइमा छिन् । विदेशी फिल्म पनि उत्तिकै हेर्न रुचाउने निकिता फुर्सदको समयमा सामाजिक सञ्जालमा पनि भुल्छिन् ।

यतिबेला भने निकिता एक नौलो लभस्टोरी फिल्ममा काम गर्न चाहेको बताउँछिन् ।

फिल्म ‘साङ्लो’ बाट आशावादी देखिएकी निकिताले यो फिल्मबाट आशा गरिएअनुसारको जस भने पाइनन् । भलै कतिपय दर्शकले उनको कामको तारिफ गरे ।

निकिता यो फिल्मको छायांकनमा खुबै रमाइलो भएको प्रतिक्रिया दिन्छिन् । मधेशी समुदायको लबजमा बोल्ने निकिताले फिल्ममा भने स्पष्ट संवाद बोलेकी छिन् ।

‘फिल्मको लागि मैले मेहनत गरेकी थिएँ, दर्शकले रुचाइदिनुभएको देख्दा खुशी छु,’ निकिता भन्छिन् ।

निकिताको करिअरलाई यो फिल्मले एक तहसम्म चिनाएको छ । भोलिका दिनमा निकिताले कस्तो फिल्ममा काम पाउनेछिन्, त्यसले पनि उनको करिअर कस्तो हुनेछ भन्ने थाहा हुनेछ । अहिले भने यत्ति भन्न सकिन्छ, ‘साङ्लो’ ले निकिताको करिअरका लागि केही न केही भूमिका पक्कै खेलेको छ ।