अंकारा– टर्की र रुसबीच सिरियामा जारी युद्धबारे वार्ता हुनुअघि सिरियाली सेनाले उत्तरी प्रान्त अलेप्पोमा रहेको विद्रोहीको नियन्त्रित अधिकांश भूभाग फिर्ता गरेको छ । अलेप्पो प्रान्तको उत्तर पश्चिमी क्षेत्रमा विद्रोहीको कब्जामा रहेको भूभाग रुसी वायुसेनाको बमबारी र इरानी लडाकुको सहयोगमा सिरियाली सेनाको व्यापक कारवाहीपछि फिर्ता लिएको हो ।

बेलायतमा रही सिरियाली युद्धको अनुगमन गरिरहेको समूहका अनुसार सिरियाली सेनाले १३ वटा गाउँ र शहरहरु विद्रोहीको कब्जाबाट फिर्ता लिइएको हो । सिरियन अब्जरभेटरी फर ह्युमन राइट्का अनुसार अब अलेप्पो प्रान्तमा दरात एज्जा नामक शहर आसपासका केही भूभाग मात्र सिरियाली विद्रोहीको नियन्त्रणमा छ । विद्रोही फौजले भने आफूनियन्त्रित भूभागबाट आफूहरु फिर्ता भएको जनाएका छन् ।

यसअघि सिरियाली सेनाले राजधानी दमास्कसलाई दोश्रो ठूलो शहर अलेप्पोलाई जोड्ने रणनीतिक रुपमा महत्वपूर्ण एम ५ राजमार्गलाई इडलिब प्रान्तमा विद्रोहीको नियन्त्रणबाट फिर्ता लिएको थियो । अर्कोतर्फ सिरियाली विद्रोहीको सबैभन्दा नजिकको साझेदार मुलुक टर्कीले भने विद्रोहीलाई सहयोग गर्नका लागि ठूलो सङ्ख्यामा सैनिक सहायता इडलिबतर्फ पठाएको टर्कीको समाचार संस्था अनादोलुले जनाएको छ ।

पछिल्ला दुई सातामा इडलिब प्रान्तमा सिरियाली सेनाको कारवाहीमा १३ जना टर्किस सैनिक मारिएका थिए । टर्कीले आफ्ना सैनिकविरुद्धको कारवाही रोक्नका लागि सिरियाली सेनाको निर्देशन दिन माग गरेको छ । टर्कीले त्यसो नभएको खण्डमा सिरियाली सेनालाई लक्षित गरी सैनिक कारवाही गर्ने चेतावनी समेत दिएको छ ।