मेक्सिकोमा मृतकको अवशेष भरिएका १९ झोला फेला परेको छ ।

मेक्सिकोको आपराधिक ग्याङ्गको हिंसाबाट प्रभावित जालिस्को राज्यमा मानिसहरुको शवको अवशेष भरिएको अवस्थामा १९ वटा प्लाष्टिकका झोला फेला परेका हुन् ।

जालिस्को राज्यको राजधानी गुआडालाजारा शहरबाट ४१ किलोमिटर दक्षिणमा रहेको इक्टाल्हुवाकान डे लोस मेम्ब्रिलोस शहरनजिकै रहेको प्रदुषित नदीमा प्लाष्टिकका झोला फेला परेका हुन् ।

जालिस्को राज्यका महान्यायाधिवक्तको कार्यालयले फोरेन्सिक अनुसन्धान गरिरहेको र झोलामा मृतकको पूरै शव वा शवको टुक्रा रहेकोबारे पत्ता लगाउने कोशिस गरिरहेको जनाएको छ । त्यसबाहेक मृतकको पहिचान गरिएपछि उनीहरु हराइरहेको उजुरी कतै भेटिएको भए त्यसको पनि अनुसन्धान गरिने छ ।

जालिस्को राज्यमा जालिस्को न्यू जेनेरेशन नामक शक्तिशाली ग्याङ्ग सक्रिय रहेको छ । उक्त ग्याङ्गले राज्यका अरु स–साना ग्याङ्गका सदस्यमाथि निरन्तर हिंसात्मक आक्रमणहरु गर्दै आएको छ ।