१ सय ५७ जनाको ज्यान जानेगरी गत आइतबार इथियोपियन एयरको विमान दुर्घटनामा मारिएका मृतकको डीएनए परीक्षण गर्न ६ महिनासम्म लाग्नसक्ने भएको छ ।

इथियोपियन एअरलाइन्सका अनुसार डीएनए परीक्षण गरी मृतकको आफन्तलाई वास्तविक शव बुझाउन ६ महिनासम्म लाग्नसक्ने जनाएको हो । यद्यपि मृतकका आफन्तलाई तत्कालै अन्तिम संस्कार गर्नका लागि विमान दुर्घटना भएको स्थानको माटो बुझाइएको बताइएको छ ।

मृतकको शव क्षत विक्षत अवस्थामा रहेकाले शव परीक्षणका लागि समय लाग्ने भएको हो ।

हरेक मृतकका परिवारलाई एक किलोग्राम दुर्घटनास्थलको माटो दिइएको र उनीहरुको मृत्युदर्ता प्रमाणपत्र दुई साताभित्र उपलब्ध गराइनेछ ।

मृतकको आइतबार इथियोपियाको राजधानी आदिस अबाबामा रहेको किडिष्ट सेलासी चर्चमा अन्तिम संस्कार गर्ने तयारी भइरहेको छ ।

त्यस्तै मृतकका आफन्तलाई अन्तिम संस्कारका लागि तत्कालै आवश्यक पर्ने खर्च पनि उपलब्ध गराइनेछ ।

यद्यपि मृतकका आफन्तहरु भने शव बुझ्न व्यग्र रहेको अन्तर्राष्ट्रिय सञ्चारमाध्यमहरुले जनाएका छन् ।

यो विमान दुर्घटनामा नेपाली युवतीको पनि मृत्यु भएको थियो । डब्ल्यूएफपी इथियोपियाकी कर्मचारीसमेत रहेकी एकता अधिकारीको घर गोरखा हो ।