काठमाडौं– नेकपाका अध्यक्ष पुष्पकमल दाहाल प्रचण्डले मंगलबार बालुवाटारमा आयोजित’‘सारङ्गी साँझ’ मा आफू उपस्थित नहुनु संयोग बाहेक केही नभएको बताएका छन् ।

प्रेस संगठन नेपालले कास्कीमा आयोजना गरेको पत्रकार सम्मेलनमा प्रचण्डले ‘सारङ्गी साँझ’ मा सहभागी नभएको अर्थ खोज्न थाले दुःख हुने बताए ।

प्रधानमन्त्रीसमेत रहेका पार्टी अध्यक्ष केपी ओली, झलनाथ खनाल, माधव नेपालसहितको सांगितिक माहोलको फोटो सामाजिक सञ्जालमा भाइरल भइरहेको सन्दर्भमा एक पत्रकारले कार्यक्रममा सहभागी नहुनु संयोग कि नियोजित भन्दै प्रश्न गरेका थिए ।

‘संयोग भन्दा पनि हिजो म विहान बालुवाटारमा थिएँ । प्रधानमन्त्री ज्यूले भरे यहाँ एउटा कार्यक्रम छ आउनै पर्‍यो भन्नु भयो’ प्रचण्डले भने,‘ मैले त पोखरा जाने कार्यक्रम बनाइसके अलि पहिलाकै कार्यक्रम हो म त बस्न नसक्ने भएँ भने ।’

त्यतिबेला प्रधानमन्त्रीले आफूलाई कार्यक्रमबारे विशेष सोच रहेको बताएको प्रचण्डले उल्लेख गरे ।

‘तपाईं आउँनै पर्थ्यो मैले अलि विशेष ढंगले सोचेको थिए भन्नु भएको थियो’प्रचण्डले भने,‘यो संयोगबाहेक केही होइन । कुनै अर्थ नखोज्नु होला दुःख हुन्छ ।’