काठमाडौं – अभिनेता विराज भट्टर पूर्वमिस नेपाल तथा डेब्यु अभिनेत्री निकिता चाण्डकको फिल्म ‘साङ्लो’ को गीत सार्वजनिक गरिएको छ ।

आइतवार युट्युबमार्फत सार्वजनिक गरिएको ‘झ्याम्मै आँखा झ्याम्मै’ बोलको गीतमा निशान भट्टराई र अञ्जु पन्तको स्वर छ । यस्तै गीतका शब्द निशान भट्टराईले नै लेखेका हुन् भने संगीत सुरेश अधिकारीले भरेका छन् ।

भिडियोको कोरियोग्राफी रामजी लामिछानेले गरेका हुन् । भिडियोमा विराज र निकिताको रोमान्स देख्न सकिन्छ ।

माघ २४ गतेदेखि प्रदर्शनमा आउन लागेको यो फिल्म रिलिजअघि चर्चामा छ । फिल्ममा विराज भट्टको निर्देशन र निर्माणसमेत छ ।

विराज र निकिताको शीर्ष भूमिका रहेको फिल्ममा जयनन्द लामा, कामेश्वर चौरासिया, प्रकाश शाह, आरपी पन्त लगायतका कलाकारले अभिनय गरेका छन् । यस्तै फिल्ममा अर्जुन जिसीको सम्पादन, श्री श्रेष्ठको एक्सन, शिवम् अधिकारीको लेखन रहेको छ ।

फिल्मलाई मानकृष्ण महर्जनले खिचेका हुन् भने एलिस कार्कीले पार्श्वध्वनि भरेका हुन् ।