इथियोपिया– १ सय ५७ जनाको ज्यान जानेगरी गत आइतबार दुर्घटनामा परेको इथियोपियन एयरलाइन्सको ब्ल्याक बक्स विशेषज्ञ अनुसन्धानका लागि फ्रान्सको राजधानी पेरिस पुर्‍याइएको छ ।

इथियोपियाका अधिकारीलाई दुर्घटनाग्रस्त बोइङ ७३७ म्याक्स ८ विमानको ककपिट भ्वाइस रेकर्डर तथा फ्लाइट डाटा रेकर्डर फ्रान्सको नागरिक उड्ययन सुरक्षा विश्लेषण तथा जाँचबुझ ब्यूरोलाई बुझाएको अन्तर्राष्ट्रिय सञ्चारमाध्यमले जनाएका छन् ।

पेरिसमा हुने विशेषज्ञ अनुसन्धानपछि विमान दुर्घटनामा पर्नुको कारण स्पष्ट हुने बताइएको छ । बोइङ ७३७ म्याक्स दुर्घटनामा परेपछि विश्वभर त्यस विमानको हवाई सुरक्षामा गम्भीर प्रश्न उठेको भन्दै विश्वका प्रमुख हवाई सेवा प्रदायकहरुले बोइङ ७३७ म्याक्स ८ विमान उडाएका छैनन् ।

बुधबारमात्रै अमेरिकाको संघीय उड्ययन निकायले बोइङ ७३७ म्याक्स ८ नउडाउन निर्देशन दिएको थियो । बोइङ कम्पनीले भने विज्ञप्ति जारी गर्दै अमेरिकी उड्ययन निकायको कदमको स्वागत गरेको जनाएको छ ।