काठमाडौं– सत्तारुढ दल नेपाल कम्युनिस्ट पार्टी (नेकपा) का दुई अध्यक्षले सभामुख बारे निर्णय गरेका छन् । सभामुखमा चयन गरिएको नामबारे आजै दिउँसो बस्ने सचिवालय बैठकबाट अनुमोदन गराउने तयारी गरिएको छ ।

आइतवार विहान करिब साढे २ घन्टा बसेको नेकपाका दुई अध्यक्ष केपी ओली र पुष्पकमल दाहाल ‘प्रचण्ड’ बीच अग्नि सापकोटालाई सभामुख बनाउने निर्णय भएको स्रोतको दाबी छ ।

तर यसबारे दुबै पक्षले कुनै औपचारिक जानकारी भने गराएका छैनन् ।

नेकपाको उच्च स्रोतले भन्यो,‘अग्नि सापकोटाको विषयमा सहमति जुटेको छ तर सचिवालय बैठकले यसबारे अन्तिम निर्णय गर्नेछ ।’

आफूलाई सभामुख बनाउने पार्टी अध्यक्षहरुको निर्णयबारे कही जानकारी नपाएको नेकपाका नेता सापकोटाले खबरहबसँग बताए ।

‘विहान दुई अध्यक्षबीच बैठक बसेको थियो, बेलुकालाई सचिवालय बोलाउने निर्णय भएको थाहा पाएँ’ सापकोटाले खबरहबसँग भने,‘सभामुख चयनबारे निर्णय भएको थाहा पाएको छैन ।’

तर, पार्टीका केही नेता र हितैसीले भने आफूलाई बधाइ दिन शुरु गरेकाले आफूपनि अलमलमा रहेको सापकोटाले बताए ।

प्रधानमन्त्री ओलीले सुवास नेम्वाङ र प्रचण्डले अग्नि सापकोटालाई सभामुख बनाउन खोज्दा लामो समय सभामुख चयनमा समस्या देखिएको थियो ।