काठमाडौ‌ं – सरकारले घोषणा गरेको ‘नेपाल भ्रमण वर्ष २०२०’ लाई सहयोग पुर्‍याउने हेतुले विश्वका चार देशमा सा‌ंगीतिक कार्यक्रम हुने भएको छ । द भ्वाइस अफ नेपाल सिजन २ का विजेतासहितको टोली विश्व भ्रमणमा निस्कन लागेको हो ।

बेलायत, युरोप, क्यानडा र इजरेलमा हुने म्यूजिकल टुरमा गायन प्रतिभाहरुको खोजी गर्ने रियालिटी सो ‘द भ्वाइस अफ नेपाल’को सिजन–२ का अन्तिम प्रतिस्पर्धीहरुले आफ्नो प्रस्तुति दिने आयोजकले जनाएको छ ।

मंगलवार राजधानीमा एक कार्यक्रमका बीच ‘द भ्वाइस अफ नेपाल’ दोस्रो सिजनका अन्तिम प्रतिस्पर्धीहरुले चार देशमा  प्रस्तुति दिनेबारे जानकारी दिइयो ।

इभेन्ट म्यानेजमेन्ट कम्पनी ब्लु वर्डले जानकारी गरायो । मार्च ६ बाट सुरु हुने विश्व यात्रामा ‘द भ्वाइस अफ नेपाल’ सिजन २ का विजेता शिशिर फागु (राम लिम्बु), सनिष श्रेष्ठ, अनु राना मगर र यन्की यल्मोले आफ्नो प्रस्तुति दिनेछन् ।

मार्च ३ देखि मार्च २३ तारिखसम्म बेलायतमा ‘द भ्वाइस अफ नेपाल’ सिजन २ का अन्तिम चार प्रतिस्पर्धीले आफ्नो प्रस्तुति दिने आयोजकले जनाएको छ ।

ब्लु वर्डका अध्यक्ष रोशन पराजुलीका अनुसार मार्च २७ देखि अप्रिल १९ सम्म युरोप, जुनको तेस्रो साता क्यानडा र अप्रिलको तेस्रो साता इजरालमा सांगीतिक कार्यक्रम हुनेछ । त्यस्तै बेलायतको ९ वटा शहरमा सांगीतिक कार्यक्रम हुनेछ भने युरोपको विभिन्न शहरमा हुनेछ । त्यस्तै, क्यानडामा ४ वटा र इजरेलमा १ वटा सांगीतिक कार्यक्रम हुने आयोजकले जनाएको छ ।