काठमाडौं – सहिद स्मारक ए डिभिजन लिगमा थ्रीस्टार क्लब फ्रेन्ड्स क्लबसँग पराजित भएको छ । आइतबार भएको पहिलो खेलमा फ्रेन्ड्सले थ्रीस्टारलाई १–० गोल अन्तरले पराजित गरेको हो ।

त्रिपुरेश्वरस्थित दशरथ रंगशालामा भएको खेलमा फ्रेन्ड्स क्लबका लागि वाग्नेर डे कार्मोले गोल गर्दै ललितपुरे क्लबलाई पञ्छाएका हुन् ।

उनले खेलको १३ औं मिनेटमा फ्रिकिकबाट गोल गर्दै टिमलाई जित दिलाएका हुन् । खेलमा आफ्नो दबाब कायम गरेपनि थ्रीस्टारले गोल फर्काउन नसक्दा हार व्येहोर्नु पर्यो । थ्रीस्टारविरुद्ध फ्रेन्ड्सले खेल रक्षात्मक खेल्दै ३ अंक जोडेको हो ।

केही समय अगाडि थ्रीस्टारमा जोडिएका शिव सुवेशी र ओलेन्देरान हाज्मतले अग्रपंङ्ती सम्हाले पनि टोलीको हार भने जोगाउन सकेनन् ।

लिगमा पहिलो जित हात पारेको फ्रेन्ड्स क्लब ५ अंकसहित ११ औं स्थान उक्लिएको छ भने पराजित थ्रीस्टार क्लब १० अंकसहित चौथो स्थानमा छ ।