हेटौंडा– प्रदेश ३ को राजधानी र नामको विषयलाई लिएर विवाद बढ्दै गएपछि सत्तारुढ दल नेपाल कम्युनिस्ट पार्टीले आफ्ना सांसदहरुलाई ह्वीप लगाउने भएको छ ।

पार्टीको सचिवालय बैठकले राजधानी हेडौंडा र नाम बागमती रहने गरी निर्णय गर्न निर्देशन जारी गरेपछि नेकपाका प्रदेश सांसदहरु विभाजित भएका छन् ।

राजधानीका विषयमा सहमति जनाउन भन्दै नेकपाले विहीबार प्रदेश संसदीय दलको बैठक बोलाएको थियो । बिहीबार बिहान करिब साढे ९ बजेदेखि बसेको बैठकले पनि नाम र राजधानीका विषयमा सर्वसम्मत निर्णय गर्न नसकेपछि शुक्रबार पुनः बैठक बोलाइएको छ ।

शुक्रबार बिहान ११ बजे बस्ने गरी बोलाइएको संसदीय दलको बैठकमा पनि सहमति नजुटे पार्टीले ह्वीप जारी गर्ने संभावना रहेको नेकपाको ३ नम्बर प्रदेशका एक सांसदले जानकारी दिए ।

बिहीबारको बैठकमा बोलेका सांसद तथा प्रदेश सरकारका मन्त्रीहरुले भने पार्टीको केन्द्रीय सचिवालय कमिटीले गरेको निर्णय मान्नुको विकल्प नभएकोमा जोड दिएका थिए ।

यसअघि केही सांसदहरुले प्रदेशसभाको हतियार क्षेत्रमाथि हस्तक्षेप गरेर पार्टी केन्द्रले प्रदेशको राजधानी र नाम तोक्न निर्देशन दिएको भन्दै आपत्ति जनाएका थिए ।