काठमाडौं- नेपाली लेग स्पिनर सन्दीप लामिछाने अष्ट्रेलियामा जारी बिग बास लिग (बीबीएल) क्रिकेट मेलबर्न स्टार्सबाट खेलिरहेका छन् ।

बुधबारको खेलमा सन्दीप निक्कै चर्चामा रहे । उनको चर्चा बुधबार चाँही खेलले हैन जुत्ताले दियो । सन्दीपले ४ ओभर बलिङ गर्दा ३९ रन खर्चिएपनि उनको जुत्ताले उनलाई चर्चामा ल्यायो ।

सिड्नीविरुद्धको खेलमा सन्दीपले नेपाल भ्रमण वर्षको प्रचार र अस्ट्रेलियाको आगलागीबाट समस्यामा परेकालाई सहयोग गर्ने सन्देश लेखेका छन् ।

सन्दीपले लगाएको एउटा जुत्तामा ‘नेपाल भ्रमण वर्ष २०२०’ लेखिएको छ । यस्तै अर्को जुत्तामा ‘बुशफायर हिरोज’ लेखेर नमस्ते गरेका छन् ।

नेपालले जनवरी १ बाट भ्रमण वर्ष मनाईरहेको छ । र, नेपालले सन् २०२० मा २० लाख पर्यटन ल्याउने योजना बनाएको छ ।

अस्ट्रेलियामा भईरहेको भिषण आगलागीको कारण हजारौ मानिस विस्थापित भएका छन् भने लाखौ जीव जन्तुको ज्यान गएको छ ।