अल्जेरिया– अल्जेरियामा १ हजारभन्दा धेरै न्यायाधीशहरुले राष्ट्रपति अब्देलाजिज बोटेफ्लिकाले आगामी राष्ट्रपतीय निर्वाचनमा दिएको उम्मेद्वारीलाई कायमै राखे आफूहरुले चुनावमा हुने मतदानको पर्यवेक्षण नगर्ने चेतावनी दिएका छन् ।

न्यायाधीशहरुले विज्ञप्ति जारी गर्दै बोटेफ्किाले आफ्नो उम्मेद्वारी फिर्ता नलिए आफूहरुले चुनावको पर्यवेक्षण नगर्ने चेतावनी दिएका हुन् । उनीहरुले अब न्यायाधीशहरुको नयाँ संघको गठन गर्ने समेत जनाएका छन् ।

सन् १९९९ देखि अल्जेरियाको सत्तामा रहेका बोटेफ्लिकाले राष्ट्रपतिको पाचौँ कार्यकालका लागि आगामी निर्वाचनमा समेत उम्मेद्वारी दिने घोषणा गरेका थिए । उनको घोषणापछि मुलुकभर उनको सत्ताविरुद्ध प्रदर्शन बढ्दै गएको छ । अल्जेरियामा आगामी महिना राष्ट्रपतीय निर्वाचन हुँदैछ ।

सन् २०१३ मा मष्तिष्कघात भएपछि उनी सार्वजनिक कार्यक्रममा देखिएका छैनन् । उनी ह्विलचियरको माध्यमबाट हिँडडुल गर्दै आएका छन् । लामो समयदेखि युरोपमा स्वास्थ्य उपचारमा रहेका बोटेफ्लिका स्वास्थ्य उपचारपछि आइतबार मात्रै स्विट्जरल्याण्डबाट स्वदेश फर्केका थिए ।