इरानका एक जना उच्च तहका कमाण्डर कासिम सोलेमानी मारिएपछि हिंसा थप भड्किन नदिन फ्रान्सका राष्ट्रपति एम्मानुएल म्यार्कों र रुसी राष्ट्रपति म्लादिमिर पुटिनबीच शुक्रबार फोनवार्ता भएको छ ।

इरानका सवै पक्ष विपक्षलगायत राष्ट्रिय र अन्तर्राष्ट्रियस्तरमा नै संयमता अपनाउन उनीहरुले आह्वान गरेका छन् ।

खतरनाक घटना हुन नदिनका लागि छिमेकी देशसँग निरन्तर सम्पर्कमा र नजिक रहेर संयमताका लागि म्यार्कों र रुसी राष्ट्रपति पुटिनले आग्रह गरेको अन्तर्राष्ट्रिय सञ्चारमाध्यमहरुले जनाएका छन् ।

दुई नेताबीचको शुक्रबारको वार्तामा पछिल्लो परिस्थितिको छलफल भएको बताइएको छ । राष्ट्रपति म्यार्कों सन् २०१५ मा परमाणु सम्झौतामा हस्ताक्षर भएको बारेमा थप समन्वय गर्न आवश्यक रहेको बारे जोड दिएका थिए ।

केहीदिन अघि बग्दादस्थित अमेरिकी दूतावासमा आक्रमण भएपछि इराक, इरान र अमेरिकाकाबीचमा विबाद थप चर्किदै गएको छ । अमेरिका र इरानका शिर्ष नेताले एक अर्कोलाई चेतावनी दिने गरेका छन् ।