काठमाडौं – पूर्वमिस नेपाल निकिता चण्डकले फिल्म ‘साङ्लो’ मार्फत नेपाली फिल्म उद्योगमा डेब्यु गर्दैछिन् । फिल्ममा उनको जोडी एक्सन स्टार विराज भट्टसँग हुनेछ ।

शुक्रवार (आज) उक्त फिल्मको ट्रेलर रिलिज कार्यक्रम थियो । कार्यक्रममा प्रायः सबै कलाकार उपस्थित थिए । निकिता पनि उपस्थित थिइन् ।

फिल्मको ट्रेलर सार्वजनिक कार्यक्रममा बोल्दै निकिताले आफू यो फिल्मबाट आशावादी भएको प्रतिक्रिया दिइन् । ‘विराज (भट्ट) दाइको गाइडेन्समा धेरै कुरा सिक्ने मौका पाएँ, उहाँले धेरै कुरा सिकाउनुभएको छ,’ निकिताले भनिन् ।

उनले एकदमै राम्रो टिम पाएको र यो फिल्म आफ्नो उत्कृष्ट डेब्यु फिल्म हुनेमा पनि विश्वास दिलाइन् । भनिन्, ‘अरु फिल्ममा यो फिल्मको भन्दा राम्रो डेब्यु हुन सक्दैनथ्यो, काम गर्दा सिकेको सीप अब अर्को प्रोजेक्टमा परिष्कृत गर्छु ।’

त्यसो त निकिताले यसअघि नै अर्को फिल्म ‘रानीमहल’ साइन गरेकी थिइन् । उक्त फिल्मको शूटिङ हुँदाहुँदै निर्माताले घाटा भएको भन्दै थप लगानी नगरेपछि फिल्म रोकिएको थियो । सो फिल्म पूर्ण भएको थिएन ।

निकिताले ‘साङ्लो’ लाई नै डेब्यु फिल्म भन्दै आइरहेकी छिन् । फिल्म ‘रानीमहल’ रिलिज नै नहुने भएपछि यो फिल्म डेब्यु हुने नै भयो ।

फिल्मबाट निकिताले राम्रो प्रतिक्रिया पाइरहेकी छिन् । ट्रेलर र यसअघि रिलिज भएको गीत ‘चरीले काफल टिप्यो’ गीतमा गरेको कामबाट उनले राम्रो प्रतिक्रिया पाएकी छिन् ।

माघ २४ गतेदेखि प्रदर्शनमा आउने ‘साङ्लो’ बाट आफू निकै आशावादी भएको निकिता बताउँछिन् ।