काठमाडौं – फिल्म ‘प्रेम गीत ३’ का निर्माता सन्तोष सेनले प्रेमगीतमा प्रदीप खड्का उर्फ ‘प्रेम’ को बुबाको भूमिकामा राजेश हमाल अझै फाइनल नभएको बताएका छन् । यद्यपि फिल्मका लागि हमाल सकारात्मक भएको सेनले बताए ।

खबरहबसँगको विशेष कुराकानीमा उनले हमालसँग पहिलो चरणको वार्ता भएपनि फिल्ममा काम गर्ने या नगर्नेबारे अझै पक्का नभएको जानकारी दिए ।

‘पहिलो चरणको वार्ता भएको हो, उहाँले कन्सेप्ट पनि मन पराइसक्नुभएको छ, तर अझै फाइनल भएको छैन,’ निर्माता सेनले भने, ‘केही दिनमा फेरि भेटघाट गर्दैछौँ, अहिले भने हामी फिल्मको कथामा नै लागिपरेका छौँ ।’

कुनै जमानाका निकै व्यस्त अभिनेता राजेश हमाल केही वर्षयता फिल्म क्षेत्रबाट सुस्ताएका छन् । फिल्म ‘प्रेमगीत ३’ मा हमालले अभिनय गरे भने  दर्शकका लागि यो फिल्म प्रतीक्षित बन्नेछ ।

फिल्मको कथाका बारेमा पनि निर्माता सेनले खुलासा गरे । उनका अनुसार यो फिल्ममा बाइसे चौबीसे राज्यको कथा हुनेछ । फिल्म निर्माण टिमले कलाकारका पोशाकलाई समेत विशेष डिजाइन दिने योजना बनाएको छ ।