काठमाडौं– आइतबार बिहान बसेको सत्तारुढ दल नेपाल कम्युनिस्ट पार्टी (नेकपा)को सचिवालय बैठक मुख्य एजेण्डामा प्रवेश नै नगरी सकिएको छ ।

आइतबार बिहान बसेको बैठकको मुख्य एजेण्डाको रुपमा भावी सभामुखको नाम तय गर्ने र अमेरिकाको मिलेनियम च्यालेन्ज कर्पोरेशन (एमसीसी) सम्झौताको कार्यान्वयनको विषयलाई तय गरिएको थियो ।

तर, आइतबारको बैठकमा ‘गृहकार्य’ नपुगेको भन्दै उक्त विषयबारे कुनै निर्णय भएन । सभामुख चयनको विषयमा २ जना अध्यक्ष केपी शर्मा ओली र पुष्पकमल दाहाल (प्रचण्ड) बीच नै सहमति हुन नसकेको जनाइएको छ ।

यस्तै, केही दिन अगाडि सम्पन्न नेकपाको स्थायी कमिटी बैठकले एमसीसी सम्झौताको विषयमा निर्णय गर्ने अधिकार सचिवालयलाई दिने निर्णय गरेको थियो । आइतबारको बैठकमा एमसीसीको विषयले पनि प्रवेश नपाएको बैठकमा सहभागी एक सचिवालय सदस्यले जानकारी दिए ।