एजेन्सी– मेक्सिकोमा एक नाइट क्लबमा गोली चल्दा कम्तीमा १५ जनाको मृत्यु भएको छ । मेक्सिकोका गुआनाहुवातो राज्यको सालामाङ्का शहरमा भएको हिंसामा अरु ७ जना घाइते भएका छन् ।

तीन वटा भ्यानमा आएका बन्दुकधारीले सालामाङ्का शहरको ला प्लेला मेन्स क्लबमा जथाभावी गोली चलाएको प्रहरीले जनाएको छ ।
स्थानीय समयअनुसार शनिबार सबेरै भएको घटनामा कुन समूहको हात छ भन्ने स्पष्ट नभएपनि त्यस क्षेत्रमा तेल चोर्ने आपराधिक ग्याङ्गले हिंसा मच्चाउँदै आएको बताइएको छ ।

पछिल्लो साता मेक्सिकोका राष्ट्रपति आन्दे्रस म्यानुअल लोपेज ओब्रादोरले आपराधिक ग्याङ्गका नाइके एल मोरो भनेर चिनिने होजे एन्टोनियो येपेजलाई पक्राउ गर्न ठूलोस्तरको कारवाहीको घोषणा गरेका थिए ।

राज्यको प्रहरीले जारी गरेको विज्ञप्तिमा १३ जनाका घटनास्थलमै मृत्यु भएको तथा अन्य दुई जनाको उपचारका क्रममा अस्वतालमा मृत्यु भएको जनाइएको छ ।

पछिल्लो हिंसा भएको गुआनाहुवातो राज्यमा केही समययता लागूऔषध तस्कर ग्याङ्ग तथा स्थानीय आपराधि समूहबाट हुने हिंसा तथा अपराधमा तीब्र बृद्धि भएको बताइन्छ ।