काठमाडौं- सशस्त्र प्रहरी बल विद्यालयका छात्राका लागि सुविधासम्पन्न छात्रावासको निर्माण भएको छ ।

भारत सरकारको रु चार करोड भन्दाबढीको अनुदान सहयोगमा कीर्तिपुर नगरपालिका चम्पादेवी–७ मा ३२ कोठे दुईतले छात्रावास भवन निर्माण भएको हो । सो भवन आज विद्यालयलाई हस्तान्तरण गरिएको छ ।

नवनिर्मित भवनमा आज भएको एक कार्यक्रममा भारतीय दूतावासका नियोग उपप्रमुख अजयकुमारले सशस्त्र प्रहरी बलका अतिरिक्त महानिरीक्षक रामशरण पौडेल, नगरपालिकाका प्रमुख तथा चम्पादेवीका सामुदायिक नेतृत्वकर्ताको उपस्थितिमा भवन हस्तान्तरण गरे ।

उक्त भवन छात्रावास प्रमुखका लागि एउटा छुट्टै कक्ष, शयन कक्षका साथै प्रत्येक तलामा छात्राका लागि फर्निचरसहितका साथै स्नानघर, सरसफाइको सुविधायुक्त संरचना निर्माण गरिएका छन् ।

नवनिर्मित संरचनाले अध्ययन–अध्यापनमा मद्दत पुग्ने विश्वास व्यक्त गर्दै नियोग उपप्रमुखले राष्ट्रका शैक्षिक पूर्वाधार निर्माणमा नेपाल सरकारले थालेका प्रयासमा सघाउन पाएकामा भारत सरकारलाई खुशी लागेको बताए ।