काठमाडौं– नेपालस्थित अमेरिकी दूतावासले लैङ्गिक हिंसाविरुद्धका क्रियाकलापहरू बर्षैभरी जारी रहनुपर्ने बताएको छ ।

सामाजिक सञ्जाल फेसबुकमा लेख्दै दूतावासले लैङ्गिक हिंसाविरुद्धको १६ दिने अभियान यो बर्षको लागि सकिएको भएपनि समानता र लैङ्गिक हिंसाविरुद्धका क्रियाकलाप बर्षैभरी जारी रहनुपर्ने बताएको हो ।

दूतावासले यो बर्ष लैङ्गिक हिंसाविरुद्धको अभियान मनाउने क्रममा नेपालभरीका हाम्रा अमेरिकन स्पेशहरूले पनि स्थानीय रूपमा विभिन्न कार्यक्रमहरूको आयोजना गरेको जनाएको छ । उसले लैङ्गिक हिंसा अन्त्यको तपाईले गर्नुभएको पहलका विषयमा समेत आफूहरुसँग बाड्न अनुरोध गरेको छ ।

महिला हिंसाविरुद्धको १६ दिने अभियान मनाउँदै गर्दा केही महिनाअघि अमेरिकी दूतावास युवा परिषद् सदस्यहरूले अछामको साँफेबगरस्थित बाबलामा छाउपडी प्रथाबारे जनचेतना कार्यक्रमको समेत आयोजना गरेको थियो ।

छाउगोठमा महिलाको निधन भएको दु:खद् समाचार आउँदै गर्दा दूतावासले सम्बन्धित समुदाय, नागरिक समाज तथा सम्बन्धित सबै सरकारी गैरसरकारी निकायहरूलाई भविष्यमा यस्तो पीडा नदोहोरिने गरी काम गर्न आग्रह गरेको थियो ।