एजेन्सी– जाडो मौसम होस् या गर्मी नै किन नहोस्, चिया पिउने मानिसहरु धेरै हुन्छन् ।

चियाको लत लागेका मानिसहरु चियाविना बस्न सक्दैनन् । सामान्यतया चियाको मूल्य प्रतिकिलो ८० देखि १ सय सम्म पर्छ होला भन्ने मानिहरु बुझ्छन् । तर, भारतको आसाममा दुर्लभ ‘मनोहारी गोल्ड चिया’ अहिलेसम्मकै भारी मूल्यमा बिक्रि भएको छ ।

गुवाहाटी टी अक्शन सेन्टरमा एक किलो मनोहारी गोल्ड टी ८० हजार रुपैयाँमा बिक्रि भएको हो । पछिल्लो वर्ष यसै चिया एक किलोग्रामको ६२ हजारमा बिक्रि भएको थियो ।

यसभन्दा अघि सन् २०१८ मा अरुणाञ्चल प्रदेशको डोनी पोलो टी एस्टेटको एक किलो गोल्डन नीडल चिया ६४ हजारमा बिक्रि भएको थियो ।

गुवाहाटी टी अक्शन बायर एसोसिएशनका सचिव दिनेश बिनानीले सार्वजनिक अक्शनमा कुनै पनि चियाको यो सबैभन्दा बढि मूल्य हो ।

माथिल्लो आसाममा डिब्रुगढमा मनोहारी टी एस्टेटका मालिक राजन लोहियाले भने ‘यस प्रकारको चिया ५ किलो मात्र बनाइएको हो । यसलाई उत्पादन गर्न निक्कै गाह्रो हुन्छ । करिब ५ वर्षबाट यसको उत्पादन सुरु गरिएको हो ।’