काठमाडौं– दक्षिण पूर्वी एसियाली क्षेत्रका आँखा स्वास्थ्य विशेषज्ञहरुको बैठक काठमाडौंमा हुने भएको छ ।

विश्व स्वास्थ्य संगठन र अन्धोपन निवारणका लागि अन्तराष्ट्रिय एजेन्सीको वित्तीय र प्राविधिक सहयोगमा नेपाल आँखा कार्यक्रम, तिलगंगा आँखा प्रतिष्ठान(विश्व स्वास्थ्य संगठनको समन्वय केन्द्र) ले यहि डिसेम्बर ९ देखि १२ सम्म आँखा स्वास्थ्य विशेषज्ञहरुद्वारा दक्षिण पूर्वी एसियाको क्षेत्रीय बैठक काठमाडौंमा आयोजना गर्न लागेको हो ।

नेपाल र दक्षिण पूर्वी एसियाली क्षेत्रमा विश्वव्यापी आँखा स्वास्थ्यको पहुँचको उद्देश्य हासिल गर्न गर्न कार्यक्रम गर्न लागिएको आयोजक तिलगंगा आँखा प्रतिष्ठानले जनाएको छ ।

बैठकमा दक्षिण पूर्वी एसियाका क्षेत्रका ४० आँखा स्वास्थ्य विशेषज्ञहरु सहभागी हुनेछन् ।  बैठकले मोतिविन्दु, दृष्टिदोष, डाइबेटिक रेटिनोपेथी, जलविन्दु, न्यून दृष्टि र सहयोगी सेवाहरुको रुपमा विभिन्न क्षेत्रमा उपलब्ध आँखा स्वास्थ्य सेवा वितरण प्रणालीलाई अझ प्रभावकारी बनाउन मद्दत गर्ने जनाइएको छ ।

बैठकमा विज्ञहरुहरुले विश्वव्यापी आँखा स्वास्थ्य सेवाको पहँुच सबै जनता समक्ष पुर्याउने लक्ष्य प्राप्त गर्न कार्यतालिका तयार गरी महत्वपूर्ण सुझावहरु पेश गर्नेछ ।  यस्तै डाइवेटिक रेटिनोपेथी सेवाको मापदण्ड तयार गर्ने र राष्ट्रिय दृष्टि २०२० को रिपोर्ट टुगों लगाउने तालिका पनि बैठकले निर्णय गर्ने छ ।