काठमाडौं– अख्तियार दुरुपयोग अनुसन्धान आयोगले जिल्ला स्वास्थ्य कार्यालय पाल्पाकी नर्स कल्पना पौडेल विरुद्ध भ्रष्टाचारको अरोपमा विशेष अदालत काठमाडौंमा आरोपपत्र दायर गरेको छ ।

जिल्ला स्वास्थ्य कार्यालय पाल्पाका कार्यरत पब्लिक हेल्थ छैटौं तहकी नर्स पौडेलले नक्कली बिल भरपाई पेश गरी सरकारी रकम भ्रष्टाचार गरेको भन्दै अख्तियारले विशेष अदालतमा आरोपपत्र दायर गरेको हो ।

नर्स पौडेलले परिवार नियोजन शिविर सञ्चालन गर्ने क्रममा परिवार नियोजनको बन्ध्याकरण शिविरमा आवश्यक सरसामान ढुवानी गर्ने, ग्राहक लिन र पुर्‍याउन जाने प्रयोजनका लागि गाडी भाडामा प्रयोग गरी ८१ हजार को फर्जि भरपाई गरेको अख्तियारको ठहर छ ।

अख्तियारले भ्रष्टाचार निवारण ऐन अनुसार नर्स पौडेललाई ८१ हजार विगो असुलउपर गर्नुपर्ने मागदावी गर्दै विशेष अदालतमा आज आरोप पत्र दायर गरिएको अख्तियारका प्रवक्ता प्रदीपकुमार कोइरालाले जानकारी दिए ।