काठमाडौं– तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीको हेलिकोप्टर दुर्घटनामा निधन भएपछि कास्की क्षेत्र नम्बर २ ‘खाली’ भयो ।
महिनादिनसम्म शोकमा रहेको कास्की–२ का मतदाताले शोक भुल्दै आफ्नो नायाँ प्रतिनिधिको खोजी शुरु गरे ।
शनिबार सम्पन्न उपनिर्वाचनबाट कास्की २ का मतदाताले आफ्नो जनप्रतिनिधि पाएका छन् । र, जनप्रतिनिधिका रुपमा निर्वाचित भएकी छन् दिवंगत नेता रवीन्द्रकी पत्नी विद्या भट्टराई ।
आफ्ना निकटतम प्रतिद्वन्द्वी नेपाली कांग्रेसका खेमराज पौडेललाई ८ हजार ४ सय ३ मतको अन्तरले पराजित गर्दै विद्या कास्की क्षेत्र नम्बर २ को प्रतिनिधिका रुपमा निर्वाचित भएकी छन् ।
सत्तारुढ नेपाल कम्युनिस्ट पार्टी (नेकपा)की उम्मेदवार विद्याले २४ हजार ३ सय ९४ मत जीत हासिल गर्दा कांग्रेसका पौडेलले भने १५ हजार ९ सय ९१ मत पाए ।
संघ, प्रदेश र स्थानीय तहका गरी ५२ जना जनप्रतिनिधिका लागि उपनिर्वाचन भएपनि कास्की क्षेत्र नम्बर २ भने सत्तारुढ नेकपा र प्रमुख प्रतिपक्षी दल नेपाली कांग्रेसका लागि ‘प्रतिष्ठाको विषय’ थियो ।
नेकपा र कांग्रेसले कास्की २ मा चुनावी अभियानलाई पनि त्यत्तिकै महत्व दिएर अगाडि बढाएका थिए ।
चुनावी सभाका दौरान नेकपा र कांग्रेसबीच विभिन्न विषयमा आरोप–प्रत्यारोप चले ।
नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीलाई मिचिएको नेपाली भूमि आफ्नो नक्सामा राख्न भारतलाई सहमति जनाएको आरोप लगाए ।
नेकपाको चुनावी सभालाई सम्बोधन गर्न बुधबार पोखरा पुगेका अर्का अध्यक्ष तथा पूर्व प्रधानमन्त्री पुष्पकमल दाहाल प्रचण्डले पनि केही ‘हलुका टिप्पणी’ गरे ।
जसमध्येको सबैभन्दा बढी चर्चा र आलोचनाको विषय बनेको प्रचण्डको टिप्पणी थियो– कांग्रेस उम्मेदवार पौडेललाई बयोबृद्ध भन्नु । प्रचण्डले पौडेललाई बयोबृद्ध मात्रै भनेनन्, ‘देवघाट गएर ध्यान तपस्या गर्नुपर्ने मान्छेलाई किन चुनावमा उठाएको ?’ भन्दै कांग्रेसमाथि नै प्रश्न गरे ।
प्रचण्डको उक्त टिप्पणीप्रति कांग्रेस प्रवक्ता विश्वप्रकाश शर्माले तत्काल आपत्ति जनाए ।
कास्कीबाट चुनावी मैदानमा रहेका पौडेलले भने प्रचण्डलाई ‘आत्मविश्वास’का साथ जवाफ पठाए– देवघाट होइन, मंसिर १४ गतेपछि तपाईंको र मेरो भेट संसद भवनमा हुन्छ । त्यसपछि देवघाट जान परे सँगै जाउला ।
तर, जनताले पौडेललाई यसपटक प्रचण्डसँग संसद भवनमै पुगेर मेट गर्ने मौका भने दिएनन् । कास्की २ का मतदाताले विद्यालाई आफ्नो प्रतिनिधिका रुपमा चयन गरे ।
कास्की २ का मतदाताको मतादेश स्वीकार गर्दै कांग्रेस उम्मेदवार पौडेलले पनि विद्यालाई बधाई दिइसकेका छन् ।
‘विजयी नानीलाई हृदयले बधाई, राम्रो गर्नु,’ पौडेलले ट्वीटरमार्फत विद्यालाई बधाई दिँदै भनेका छन् ।
सम्झिदिनु एक निष्ठावान मान्छे चुनाव हारेर पनि हाँस्दै गयो, जुन प्रक्रियाका लागि अर्पित थियोे मेरो जीवन।
म ईमानदार रहनेछु कास्कीको म प्रत्येक मत, अनि देशविदेशका हरेकको मायाप्रति। राजनीति जितें, मत जितिनँ तर सायद मन जितें कि जस्तो लाग्छ।
विजयी नानीलाई हृदयले बधाई-राम्रो गर्नु।
— Khemraj Paudel (@nckhemrajpaudel) December 1, 2019
प्रतिक्रिया