काठमाडौं– नेपाली राष्ट्रिय क्रिकेट टोलीका लेग स्पिनर सन्दीप लामिछानेले आँखाको अप्रेशन पछि लामो दूरीको वस्तु चिन्न सजिलो भएको बताएका छन् ।

सोमबार तिलगंगा अस्पतालमा आँखाको ‘लेजर सर्जरी’ गराएपछि सन्दीपले चस्माको विकल्पमा आँखाको सर्जरी गरेको बताएका छन् ।

अप्रेशन पश्चात लामिछानेले अस्पताललाई दिएको प्रतिक्रियामा उनले आफू अप्रेशन अगाडिको भन्दा अहिले राम्रो देख्न थालेको बताएका छन् ।
‘टाढाको वस्तु देख्ने समस्या भएपछि चस्मा लगाउनुको विकल्पमा मैले यो सर्जरी गरेको हुँ । विदेशमा पनि बुझेको थिए यस सम्बन्धी तर आफ्नै देशमा गर्ने सोच भएर यहाँ अप्रेसन गराएँ,’ लामिछानेलाई उदृत गर्दै अस्पतालले लेखेको छ,‘म एकदमै खुशी र सन्तुष्ट छु । शल्यक्रिया पश्चात भिजनमा सुधार भएको छ ।’