काठमाडौं- सरकारले वैदेशिक रोजगारीमा जाने कामदार र विदेशमा कार्यरत श्रमिकले ई–टोकन म्यासेजिङबाट श्रम स्वीकृतिको सेवा शुरु गर्ने भएको छ ।

वैदेशिक रोजगारीमा जाने श्रमिकका हकमा मंसिर १५ गतेदेखि श्रम स्वीकृतिका लागि अनलाइन आवेदन पेश गर्ने बित्तिकै श्रम स्वीकृति लिन मिल्ने दिन र समय थाहा पाउने वैदेशिक रोजगार विभागले जनाएको छ ।

श्रम स्वीकृतिको जानकारी पनि मोबाइलमा मेसेजबाटै प्राप्त गर्न र सेवाग्राहीले फाराम भर्दा पेश गरेको इमेलमा श्रम स्टीकर पठाउने विभागले जनाएको छ ।

आइनलाइनबाटै पुनः श्रम स्वीकृतिका लागि आफूलाई पायक पर्ने श्रम कार्यालय छान्न सकिने पनि वैदेशिक रोजगार विभागका महानिर्देशक डा.भिष्मकुमार भुसालले जानकारी दिएका छन् ।

वैदेशिक रोजगारीमा जाने कामदारका हकमा सेवालाई थप प्रभावकारी बनाउन विभागले म्यासेजिङ प्रणालीलाई शुरु गरेको महानिर्देशक भुसालले बताए ।

आवेदन बुझाइसकेपछि कुनै कारणले श्रम स्वीकृति वा अस्वीकृत भएमा वा थप कागजात पेश गर्नु परेमा यो प्रणालीबाट मोबाइलमा म्यासेज आउने उनको भनाइ छ ।

वैदेशिक रोजगारीमा जाने कामदारलाई फारम भर्दा सहि नम्बर प्रयोग गर्न विभागले अनुरोध गरेको छ । अनलाइनबाटै फारम भरेर तोकिएको समयमा कार्यालयमा पर्खिरहनुपर्ने पुरानो परम्पराको अन्त्य हुने विभागको विश्वास छ ।