काठमाडौं- स्पेनको स्वायत्त क्षेत्र क्याटलोनियाको सबै भन्दा ठूलो पार्टीले स्पेनको नयाँ सरकारलाई समर्थन गर्ने भएको छ।

क्याटलोनियालाई स्पेनबाट स्वतन्त्र बनाउनु पर्ने माग गर्दै आएको पार्टी एस्क्वेरा रिपब्लिकाना डी क्याटालुनिया (इआरसी) ले स्वतन्त्रता सम्बन्धी वार्तामा फर्किनलाई सरकारको समर्थन गर्ने निर्णय गरेको हो ।

सोसल डेमोक्र्याटिक पार्टी इआरसीका ९५ प्रतिशत सदस्यले सरकारलाई समर्थन गर्ने पक्षमा मत दिएका हुन् । अब नोभेम्बरमा भएको चुनावमा बहुमत ल्याउन नसकेको सोसलिस्ट पार्टी नेतृत्वको सरकारका लागि किङ्गमेकर बन्न सक्ने छ ।

सोसलिस्टले एन्टी–क्यापिटलिस्ट पार्टी पोडेमोससँग पनि गठबन्धन बनाउने क्रम जारी राखेको छ । सोसलिस्टको १२० तथा पोडेमोसको ३५ गरेर १५५ सिट पुगे पनि सरकार बनाउनका लागि चाहिने १७६ सिट भन्दा कम हो ।

तर इआरसीले समर्थन गर्ने बताएपछि बहुमतको नजिक पुग्ने देखिएको छ । इआरसीको १३ सांसद छन् । अरु वामपन्थी पार्टीले पनि समर्थन गर्न सक्ने सम्भावना छ ।