गण्डकी– कास्कीमा प्रहरीले गत असोज महिनामा विभिन्न मुद्दामा अदालतबाट दोषी ठहर भई सजाय भुक्तान नगरी फरार रहेका ३२ जना प्रतिवादीलाई पक्राउ गरेको छ ।

जिल्ला प्रहरी कार्यालय, कास्कीका अनुसार पक्राउ पर्नेमा २३ पुरुष र नौ महिला छन् । उनीहरूलाई कैद सजाय भुक्तान गराउन र जरिवाना असुल गर्न अदालतमा बुझाइएको कार्यालयका सूचना अधिकारी एवं प्रहरी नायब उपरीक्षक वीरेन्द्रकुमार पासवानले जानकारी दिए।

उहाँका अनुसार पक्राउ परेका प्रतिवादीबाट १२ वर्ष छ महिना आठ दिन कैद तथा १६ लाख ६६ हजार ९७२ रुपैयाँ बिगो असुलउपर भएको छ ।

चेक अनादर, बिगो लेनदेन, बैंकिङ कसुर, सवारी ज्यान र अभद्र व्यवहारलगायत मुद्दामा अदालतबाट दोषी ठहर भई फरार रहेका प्रतिवादीलाई पक्राउ गरिएको प्रहरीले जनाएको छ ।

प्रहरीले फरार प्रतिवादीलाई कानुनी दायरामा ल्याउन सक्रियता बढाएको छ । गत भदौ महिनामा कास्कीमा ५६ जना फरार प्रतिवादी पक्राउ परेका थिए । असोज महिनामा चालु मुद्दामा पनि ११२ जना पक्राउ परेको कार्यालयले जनाएको छ ।

यसैबीच, असोज महिनामा कास्कीमा अपराधसम्बन्धी १५९ वटा मुद्दा दर्ता भएका छन् । तीमध्ये जघन्य तथा गम्भीर अपराधका २५, महिला, बालबालिका तथा ज्येष्ठ नागरिकसँग सम्बन्धित सात, आर्थिक अपराधका २४ र अन्य अपराधसम्बन्धी १०३ वटा मुद्दा रहेका छन् ।

सोही अवधिमा सामाजिक हिंसासम्बन्धी ६९ वटा ठाडो उजुरी परेको जिल्ला प्रहरी कार्यालयले जनाएको छ ।