तेहरान–  प्राविधिक समस्या र सुरक्षा चिन्ताका कारण इरान र पाकिस्तानबीचको सीमापार आवागमन तथा व्यापार अस्थायी रूपमा बन्द गरिएको छ।

इरानको विदेश मन्त्रालयका प्रवक्ता इस्माइल बाघाईले शनिबार प्राविधिक समस्या र आवश्यक सुरक्षा सावधानीका कारण सीमा आवागमन अस्थायी रूपमा रोकिएको जानकारी दिएका हुन्। इरानी समाचार संस्था इरनाका अनुसार दुवै देशका अधिकारीहरू सीमा नाकालाई यथाशीघ्र सामान्य अवस्थामा फर्काउन छलफलमा जुटेका छन्।

यसैबीच, पाकिस्तानले शुक्रबारदेखि गब्द–रिमदान र तफ्तानका आधिकारिक सीमा नाकाबाट हुने व्यापार रोकेको छ। पाकिस्तानी समाचारपत्र डनका अनुसार वाणिज्य मन्त्रालयले अक्टोबर ३ मा जारी गरेको पुरानो आदेश खारेज गर्दै नयाँ आधिकारिक सूचना जारी गरेपछि व्यापार रोकिएको हो।

बलुचिस्तानका मुख्यमन्त्रीका सञ्चार तथा राजनीतिक मामिलासम्बन्धी सल्लाहकार शाहिद रिन्डले सीमा बन्द गर्नुको उद्देश्य सुरक्षा व्यवस्था सुदृढ बनाउनु, तस्करी नियन्त्रण गर्नु र सीमा प्रशासनलाई व्यवस्थित गर्नु रहेको बताएका छन्।

उनले सामाजिक सञ्जालमा फैलिएका अपुष्ट खबरमा विश्वास नगर्न आग्रह गर्दै सीमा बन्द गर्ने निर्णय सुरक्षा अवस्था र प्रशासनिक समस्या सुधार गर्ने उद्देश्यले गरिएको बताएका छन्।

रिन्डका अनुसार दुवै देशका उच्च अधिकारीहरू प्रशासनिक समस्या समाधान गर्न वार्तामा छन्। सीमा व्यवस्थापनलाई प्रभावकारी बनाउने र अवैध तस्करी नियन्त्रण गर्ने उद्देश्यले समन्वित प्रणाली स्थापना गर्ने कामसमेत भइरहेको उनले जानकारी दिएका छन्।

उनले जारी छलफल र प्रगतिका आधारमा पाकिस्तान–इरान सीमा नाका चाँडै पुनः सञ्चालनमा आउन सक्ने आशा व्यक्त गरेका छन्।