चितवन- विगतका वर्षमा खेलकुद, सांस्कृतिक कार्यक्रम, नाचगान र सामूहिक भोज गरेर दसैँ मनाउँदै आएका चितवन कारागारका कैदीबन्दीले यस वर्ष सामान्य रूपमा मात्रै पर्व मनाउने भएका छन् ।

भदौ १० गतेको भोटेकोशी बाढीलगायत विपद्का कारण देश शोकमा रहेकाले दसैँमा पहिलेको जस्तो उत्साह नभएको कैदीबन्दीले बताएका छन् । उनीहरूले सामूहिक भोज तथा मनोरञ्जनका कार्यक्रम नगरी परिवारसँग टीका लगाउने र सामान्य रूपमा दसैँ मनाउने योजना बनाएका छन् ।

विगत १५ वर्षदेखि कारागारमा कैद जीवन बिताइरहेका पदमबहादुर थारू (नाम परिवर्तन) ले अघिल्ला वर्षको तुलनामा यसपटक दसैँ मनाउने उत्साह नरहेको बताए । यस वर्ष शाकाहारी रूपमा दसैँ मनाउने योजना रहेको उनले जानकारी दिए ।

अर्का कैदी कृतन शर्मा (नाम परिवर्तन) का अनुसार विगतका वर्षमा दसैँका अवसरमा विभिन्न खेलकुद, सांस्कृतिक कार्यक्रम र सामूहिक भोज आयोजना गरिन्थ्यो । सामूहिक भोजका लागि राँगा, कुखुरा, बोका र खसीलगायत पशु ल्याएर काट्ने गरिए पनि यस वर्ष त्यस्ता कार्यक्रम नहुने उनले बताए ।

‘कसैले व्यक्तिगत रूपमा खान्छ भने खाओस्, तर यस वर्ष सामूहिक रूपमा हुने कार्यक्रम हुँदैनन्,’ उनले भने । उनका अनुसार दसैँको टीकाका दिन परिवारसँग भेटघाट गरी टीका लगाउनेबाहेक अन्य विशेष कार्यक्रम गर्ने योजना छैन ।

कारागारभित्रका साथीहरू परिवारजस्तै लाग्ने भएकाले विगतका वर्षमा दसैँ मनाउँदा घरको यादले त्यति सताउने नगरेको उनले बताए । तर, यस वर्ष देशमा विपद्ले पुर्‍याएको क्षतिका कारण उत्सव मनाउने मनस्थिति नरहेको उनको भनाइ छ ।

कारागारमा रहेका महिला कैदीबन्दीले पनि यस वर्ष नाचगान तथा अन्य मनोरञ्जनका कार्यक्रम नगर्ने भएका छन् । विगत १० वर्षदेखि कैद जीवन बिताइरहेकी उर्मिला सुब्बा (नाम परिवर्तन) ले बाढीपहिरोका कारण देश शोकमा रहेकाले उत्साहका साथ दसैँ मनाउने अवस्था नरहेको बताइन् । उनीहरूले पनि टीकाका दिन परिवारसँग टीका लगाउने योजना बनाएका छन् ।

कारागार कार्यालय चितवनमा हाल ७३९ कैदीबन्दी छन् । तीमध्ये ४६ महिला र ६९३ पुरुष छन् । कारागारका सूचना अधिकारी चेतनाथ ढुङ्गानाका अनुसार यस वर्ष कारागार प्रशासन र आन्तरिक प्रशासनले दसैँलाई सामान्य रूपमा मनाउने योजना बनाएका छन् ।

देशभरका नेपालीमा विपद्का कारण उत्साह कम रहेकाले कारागारका कैदीबन्दीले पनि सामान्य रूपमा दसैँ मनाउने तयारी गरेको उनले बताए ।