कास्की– सेती नदीमाथि निर्माणाधीन दुईवटा पक्की पुलको करिब ७० प्रतिशत काम पूरा भएको छ । आगामी फागुन २१ गतेभित्र निर्माण सम्पन्न गर्ने लक्ष्यसहित कामलाई तीव्रता दिइएको छ ।

मुग्लिन–पोखरा सडक आयोजना पश्चिम खण्डअन्तर्गत पृथ्वीराजमार्गमा रहेको पुरानो पुलको दायाँ र बायाँतर्फ नयाँ पुल निर्माण भइरहेको हो । अपस्ट्रिम र डाउनस्ट्रिम नाम दिइएका दुवै पुल १९० मिटर लम्बाइका छन् ।

पुल निर्माणका लागि २०७९ भदौ २६ गते रु एक अर्ब सात करोडमा ठेक्का सम्झौता भएको थियो । एसियाली विकास बैंकको ऋण सहयोगमा सडक विभागअन्तर्गत निर्माण भइरहेको उक्त पुलको ठेक्का एम/एस रसुवा कन्स्ट्रक्सन कम्पनी प्रालिले पाएको हो ।

मुग्लिन–पोखरा सडक आयोजना पश्चिम खण्डका आयोजना प्रमुख कृष्णबहादुर कुँवरले पुलको भौतिक प्रगति करिब ७० प्रतिशत पुगेको जानकारी दिए। निर्माणका क्रममा देखिएका अवरोध हटिसकेकाले निर्धारित म्यादभित्रै काम सम्पन्न हुने उनले बताए ।

‘पुल अब म्यादभित्रै सम्पन्न हुन्छ । काममा कुनै अवरोध छैन । घरटहराको मुआब्जालगायत विषयसमेत टुङ्गो लागेर सम्बन्धित व्यक्तिले रकम बुझिसक्नुभएको छ’, उनले भने ।

निर्माण कम्पनीका अनुसार डाउनस्ट्रिम पुलको गर्डर निर्माण सम्पन्न भइसकेको छ भने चारवटा टावर (पाइलन) निर्माणको काम अन्तिम चरणमा पुगेको छ । अब मुख्य रूपमा पुललाई अड्याउने स्टे केबलमा तनाव दिने (स्ट्रेसिङ) काममा ध्यान केन्द्रित गरिएको छ ।

तीन वर्षभित्र निर्माण सम्पन्न गर्ने लक्ष्यसहित सम्झौता भए पनि विभिन्न समस्याका कारण निर्धारित समयमा काम पूरा हुन नसकेपछि म्याद थप गरिएको थियो । हाल निर्माणको म्याद आगामी फागुन २१ गतेसम्म कायम छ ।

आयोजना प्रमुख कुँवरका अनुसार चीनबाट आवश्यक जनशक्ति ल्याउनुपर्ने र चिनियाँ कामदारबाट इन्जिनियरिङबाहेकका काम गराउन कठिन हुने अवस्थाले निर्माणमा ढिलाइ भएको हो । निर्माण सामग्री चीनबाट ल्याउन भएको ढिलाइ र खानेपानीका पाइप स्थानान्तरण गर्नुपर्नेलगायत समस्याले पनि काम प्रभावित भएको थियो ।

त्यसैगरी, सेती नदीको उत्तरी भागमा सडक पहुँच व्यवस्थापन, जग्गा प्राप्ति र मुआब्जासम्बन्धी समस्याले निर्माणमा अवरोध सिर्जना गरेको थियो । एसियाली विकास बैंकको नीतिअनुसार सम्बन्धित जग्गाधनी तथा व्यवसायीलाई सडक पहुँच उपलब्ध गराउनुपर्ने भएपछि दुईवटा घर भत्काउनुपरेको थियो ।

मुआब्जाको विषयमा प्रशासनले निर्धारण गरेको रकमप्रति असन्तुष्टि जनाउँदै केही जग्गाधनीले रकम बुझ्न नमानेपछि निर्माण प्रभावित भएको थियो । लामो प्रयासपछि सहमति जुटेकाले अहिले पुलको माथिल्लो भागमा समेत काम गर्न समस्या नरहेको आयोजना प्रमुख कुँवरले बताए।

सेती नदीमाथिको हालको पुल विसं २०३२ मा निर्माण गरिएको हो । पुरानो पुल साँघुरो भएपछि सवारी आवागमन सहज बनाउने उद्देश्यले त्यसको दायाँ र बायाँतर्फ थप एक–एकवटा पक्की पुल निर्माण थालिएको हो ।