एजेन्सी– पाकिस्तानले आतंकवादी समूह जैश–ए–मोहम्मदका नेता मौलाना मसुद अजहरका नजिकका दुई नातेदारसहित दर्जनौँ संदिग्ध लडाकुलाई गिरफ्तार गरेको छ । पाकिस्तानी आन्तरिक मामिला मन्त्रालयका प्रवक्तले मंगलबार जनाए अनुसार मौलाना मसुद अजहरका छोरा हम्माद अजहर तथा भाई मुफ्ती अब्दुल रउफसहित ४४ जना संदिग्ध लडाकुलाई गिरफ्तार गरिएको हो ।
गत फेब्रुअरी १४ मा भारत प्रशासित कश्मीरको पुलावामामा ४४ जना भारतीय अर्धसैनिकको ज्यान जानेगरी भएको आत्मघाती आक्रमणको जिम्मा लिएको आतंकवादी समूह जैश–ए–मोहम्मदका लडाकुलाई गिरफ्तार गर्न पाकिस्तानसमक्ष दबाब रहँदै आएको थियो ।
पाकिस्तानले सो समूहका नेता मौलाना मसुद अजहरलाई भने गिरफ्तार गरेको छैन ।
पुलावामा आक्रमणपछि भारतले पाकिस्तानलाई बुझाएको पत्रमा आक्रमणमा मसुद अजहरका भाइ मुफ्ती अब्दुल रउफ तथा छोरा हम्माद अजहरको नाम उल्लेख रहेको बताइएको छ ।
पाकिस्तानका सबै प्रान्तका प्रतिनिधि सम्मिलित राष्ट्रिय सुरक्षा समितिको उच्चस्तरीय बैठकपछि पाकिस्तानी सुरक्षा निकायको निगरानीमा रहेका संदिग्ध लडाकुलाई गिरफ्तार गरिएको जनाइएको छ ।
यद्यपि पक्राउ गरिएका सबैको नाम भारतले पाकिस्तान समक्ष बुझाएको पत्रमा उल्लेख नभएको बताइएको छ ।
त्यसबाहेक पाकिस्तान सरकार आतंकवादी समूहको सम्पत्ति पनि रोक्का गर्न तयार रहेको आन्तरिक मामिला मन्त्रालयले जनाएको । पाकिस्तानको १९९७ को प्रतिआतंकवाद अधिनियम अनुसार पाकिस्तानले आतंकवादी समूहको सम्पत्ति रोक्का गर्न समेत तयार रहेको आन्तरिक मामिला मन्त्रालयले जनाएको हो ।
यदी कुनै समूहविरुद्ध पाकिस्तानले प्रमाण भेटेमा पाकिस्तानले ती समूहविरुद्ध अनुसन्धान गरी आवश्यक कानूनी कदम चालिने जनाइएको छ ।