काठमाडौँ– च्याम्पियन्स लिग फुटबलमा इंग्लिस क्लब म्यानचेस्टर सिटी फ्रान्सेली क्लब पेरिस सेन्ट जर्मेन (पीएसजी) सँग स्तब्ध बनेको छ । गएराति भएको खेलमा पीएसजीले सिटीलाई ४–२ गोलको अन्तरले हराएको हो ।

पीएसजीका लागि डेसिरे डुए, ओसमान डेम्बेले, भिटिन्हा र म्याग्नेस अक्लियोचेले एक–एक गोल गरेका थिए । म्यानचेस्टर सिटीका अर्लिङ हालाण्डले दुई गोल फर्काएका थिए ।

पीएसजीका डुएले खेलको १३औँ मिनेटमा गोल गर्दै पीएसजीलाई सुरुवाती अग्रता दिलाएका थिए । यस्तै, १५औँ मिनेटमा डेम्बेलेले गोल गर्दै टोलीको अग्रतालाई दोब्बर बनाए । ३२औँ मिनेटमा भिटिन्हाले गोल गरेपछि पीएसजी ३–० गोलले अगाडि भयो ।

खेलको ५३औँ मिनेटमा सिटीका हालाण्डले गोल गर्दै खेललाई ३–१ गोलको स्थितिमा ल्याए । तर ६३औँ मिनेटमा म्याग्नेसले गोल गरेपछि पीएसजीले ४–१ गोलको अग्रता लियो ।

खेलको ७५औँ मिनेटमा हालाण्डले व्यक्तिगत दोस्रो गोल गरेर खेललाई ४–२ को अवस्थामा ल्याए पनि सिटीको हारलाई जोगाउन सकेनन् ।

यो जितसँगै पीएसजी २ खेलबाट ६ अंकसहित शीर्षस्थानमा रहेको छ । पराजित भएको म्यानचेस्टर सिटी समान खेलबाट ३ अंकका साथ तालिकाको १७औँ स्थानमा छ ।