किएभ- युक्रेनको राजधानी किएभमा रुसी ब्यालेस्टिक क्षेप्यास्त्र आक्रमणमा परी एक जनाको मृत्यु भएको छ भने छ जना घाइते भएका छन् ।

युक्रेनी राष्ट्रपति भोलोदिमिर जेलेन्स्कीले मंगलबार राति भएको आक्रमणअघि पश्चिमा सहयोगी राष्ट्रहरूबाट पूर्वसूचना प्राप्त नभएको बताए  । उनका अनुसार यसै साता युक्रेनमा यस प्रकारको आक्रमण दोस्रोपटक भएको हो ।

राष्ट्रपति जेलेन्स्कीले सामाजिक सञ्जाल फेसबुकमार्फत आक्रमणबाट किएभस्थित एक आवासीय भवनमा क्षति पुगेको जानकारी दिएका छन् । राजधानीको प्रमुख विद्युत् उत्पादन केन्द्रमध्ये एउटालाई समेत निशाना बनाइएको उनले बताएका छन् ।

यसअघि अमेरिकी राष्ट्रपति डोनाल्ड ट्रम्पले गत सप्ताहान्तमा रुस र युक्रेन ऊर्जा क्षेत्रमा युद्धविराम गर्न सहमत भएको घोषणा गरेका थिए । त्यसपछि राष्ट्रपति जेलेन्स्कीले पनि रुस ऊर्जा क्षेत्रमा युद्धविराम गर्न सहमत भए युक्रेनले समेत त्यसलाई स्वीकार गर्ने बताए ।

मंगलबार पत्रकारहरूसँग कुरा गर्दै राष्ट्रपति ट्रम्पले अमेरिकाले युक्रेनसँग गुप्तचरसम्बन्धी सूचना आदानप्रदान गरिरहेको र युद्ध अन्त्यका लागि रुस तथा युक्रेन दुवै पक्षसँग निरन्तर प्रयास गरिरहेको बताए।

‘हामी उनीहरूलाई सहयोग गरिरहेका छौँ र गुप्तचरसम्बन्धी सूचना पनि साझा गरिरहेका छौँ’, ट्रम्पले भभनेभयो ।

यसैबीच, युक्रेनी समाचार संस्था उक्रिनफर्मका अनुसार बुधबार बिहान पनि रुसले किएभलाई लक्षित गरी ब्यालेस्टिक क्षेप्यास्त्र प्रहार गरेपछि राजधानीमा पुनः विस्फोटका आवाज सुनिएका थिए ।

लगातार भइरहेका आक्रमणले युक्रेनमा सर्वसाधारणको सुरक्षा र महत्त्वपूर्ण ऊर्जा पूर्वाधारको संरक्षणबारे चिन्ता बढाएको छ । ऊर्जा क्षेत्रमा युद्धविरामको घोषणा भए पनि त्यसको कार्यान्वयन र युद्ध अन्त्यका लागि कूटनीतिक प्रयासको प्रभावकारिताबारे प्रश्न उठेका छन् ।