काठमाडौं– मलेसियाका लागि प्रस्तावित राजदूत चुडामणि खरेलमाथि गम्भीर आरोप लागेको छ । बुधबार सिंहदरबारमा बसेको संसदीय सुनुवाइ समितिमा भएको बैठकमा राष्ट्रिय स्वतन्त्र पार्टीका सांसद राजिव खत्रीले गम्भीर आरोपसहितको पत्र प्राप्त भएको बताएका हुन् ।

‘झापामा स्थानीयहरूसँग अनुदान मिलाइदिन्छु भनेर लाखौं रुपैयाँ लिएको, राजदूत नियुक्त भएसँगै तिर्न सुरु गरेको, तिर्ने क्रममा रहेको, सामाजिक सञ्जाल पनि धेरै प्रयोग गर्ने, कतिपयसँग पैसा लिएपछि ब्ल्याकलिस्टमा राख्ने गरिएको भनेर केही प्रमाणसहितका उजुरी हामीलाई प्राप्त भएका छन्, व्यक्तिगत रूपमा मलाई ह्वाट्सएपमा प्राप्त भएका छन्’, खत्रीले समितिमा भने ।

खत्रीले लगाएको आरोप भने खरेलले अस्वीकार गरेका छन् ।

प्रस्तावित राजदूत खरेलमाथि गम्भीर आरोप लागेपछि समितिका सभापति बोधनारायण श्रेष्ठले सुनुवाईको प्रक्रियालाई होल्ड गर्ने निर्णय सुनाएका छन् । सोही क्रममा समितिका केही सदस्यले उपसमिति बनाएर अध्ययन गर्नुपर्ने प्रस्ताव पनि राखेका छन् यद्यपि सो विषयमा समितिले कुनै निर्णय गरेको छैन ।