काठमाडौं– सरकारले निजी क्षेत्रका छाता संगठनहरूलाई पत्र लेखेरै श्रमिकलाई चाडपर्वमा एक महिना बराबरको पारिश्रमिक उपलब्ध गराउन भनेको छ । 

श्रम तथा व्यवसायजन्य सुरक्षा विभागले प्रचलित कानुनबमोजिम श्रमिकहरूलाई चाडपर्व खर्च उपलब्ध गराउन विभिन्न रोजगारदाता, उद्योग-व्यवसाय तथा निजी शैक्षिक क्षेत्रका छाता सङ्गठनहरूलाई निर्देशन दिएको हो । 

पत्रमार्फत विभागले श्रम ऐनको कानुनी व्यवस्थालाई प्रभावकारी रूपमा कार्यान्वयन गराउन सम्बद्ध संस्थाहरूको ध्यानाकर्षण पनि गराएको छ ।

विभागका अनुसार श्रम ऐन, २०७४ को दफा ३७ मा प्रचलित धर्म, संस्कृति तथा परम्परानुसार मनाइने चाडपर्वका लागि प्रत्येक श्रमिकले आफूले खाईपाई आएको एक महिनाको आधारभूत पारिश्रमिक बराबरको रकम प्रत्येक वर्ष चाडपर्व खर्चका रूपमा पाउने व्यवस्था रहेको छ । उक्त कानुनी व्यवस्थाको प्रभावकारी कार्यान्वयनका लागि सम्बद्ध रोजगारदाता तथा प्रतिष्ठानहरूलाई आवश्यक जानकारी गराई प्रत्येक श्रमिकलाई कानुनबमोजिम चाडपर्व खर्च उपलब्ध गराउने व्यवस्था मिलाउन पत्रमा भनिएको छ ।

विभागले नेपाल उद्योग वाणिज्य महासङ्घ, नेपाल उद्योग परिसङ्घ, नेपाल चेम्बर अफ कमर्स, निजी तथा आवासीय विद्यालय अर्गनाइजेसन नेपाल (प्याब्सन) र राष्ट्रिय निजी तथा आवासीय विद्यालय एसोसिएसन नेपाल (एन-प्याब्सन) लाई पत्राचार गर्दै सम्बद्ध रोजगारदाताहरूलाई जानकारी गराई चाडपर्व खर्च उपलब्ध गराउन निर्देशन दिएको छ ।